Өнөөдөр буюу 2021.03.01-ний өдөр хөдөлмөр бүтээлээ төрдөө үнэлүүлж Төрийн дээд шагнал АЛТАНГАДАС одонгоор шагнагдсан Улсын драмын эрдмийн театрын жүжигчин МУСТА О.Гэрэлсүхэд театрын урдирдлага, хамт олон баяр хүргэж, хүндэтгэл үзүүлэв.
33 жилийн турш соёл урлагийн салбарт зүтгэсэн тэрбээр бага наснаасаа эхлэн Монголын хүүхдийн ордны Драмын дугуйлангаас жүжигчин болох гараагаа эхлэж байсан бөгөөд 1996 онд анхны Ромео болон драмын театрын тайзнаа гарч ирсэн юм.
Түүнээс хойш тайз дэлгэцийн олон уран бүтээлүүдэд тоглосоноос дурьдвал С.Жаргалсайхан “Хаан түүх” жүжиг, У.Шекспир “Ромео Жульетта”, О.Нил “Тамын дурлал”, “Энхтуул” хошин жүжиг, Дариа Фо “Чөлөөт хос” жүжиг, Э.Оюун “Би эндээс явахгүй” жүжиг гээд 20 гаруй жүжгийн гол ба туслах дүр, “Замын хүн” жүжгийн найруулагчаар ажиллаж, “Ларьдма” УСК, “ТюТю” УСК, “Амьдралын нахиа” УСК, “Модон могой” УСК, “Мамма Миа” музыкл кино гэх мэт 40 гаран дэлгэцийн уран бүтээлийн гол ба туслах дүрүүдийг амжилттай бүтээж, театр урлаг судлаач, шүүмжлэгч, мэргэжил нэгт уран бүтээлчдийн зүгээс өндөр үнэлгээ авч, үзэгч олны талархлыг хүлээж байсан билээ.
Ийнхүү төрийн дээд шагналаар шагнагдсан жүжигчин О.Гэрэлсүхдээ театрын хамт олны нэрийн өмнөөс баяр хүргэж цаашдынх нь уран бүтээлд өндөр амжилт хүсье. Таныг урлагийн тэнгэр Янжинлхам бурхан үргэлжид ивээг.
