Эдийн засагт хийсэн судалгааны талаар эдийн засагч Л.Оюун: Өнгөрсөн хугацаанд эдийн засгийн нөхцөл байдалд судалгаа хийлээ. Жижиг дунд үйлдвэр төдийгүй бүхий л салбар маш хүнд байдалд орсон байгаа. Судалгаа, нотолгоон дээр үндэслэн цаашид авах арга хэмжээнүүдийг төлөвлөж явдаг.
Эдийн засгийн нөхцөл байдал хүнд байна. Энэ хүнд байдал цаашид улам хүндрэх нь гэдгийг судалгаан дээр үндэслэн мэдээлэх нь зүйтэй гэж үзлээ. Цар тахлын нөхцөл байдал нэлээд өргөн хүрээг хамарч байна. Иймээс УОК-оос хөл хориог 12 хоногоор тогтоох шийдвэр гаргалаа. Хөл хорионы үеэр буюу Сар шинийн өдрүүдэд аль болох айл хэсэхгүй байх нь чухал.
Бид цагаан сарыг битгий тэмдэглээч гээгүй. Айл хэсэхгүй байгаач гэсэн. Бид санамсаргүйгээр бусад хүмүүст өвчин тархаах магадлалтай байна. Ууц, тавгийн боовны худалдан авалтыг харахад цагаан сарыг тэмдэглэх өнгөтэй байна. Өвчин хөдөө орон нутаг руу дахин тархах магадлал өндөр байна. ЭМЯ-наас өдөр бүр анхааруулаад байхад хүмүүсийн хандлага өөрчлөгдөхгүй байна.
Тиймээс хатуухан хэлэхээс өөр арга алга. Хамаатан садан, ах дүү, аав ээж, эрсдэлтэй бүлгүүдээ хайрлахгүй, коронавирусээс харамлахгүй байгаа бол очиж золгох байх даа. Ингэж л анхааруулахгүй бол байдал хүнд болох нь. Халдварыг тархаахгүй байх боломж 100 хувь байна. Энэ биднээс шалтгаална.
Сүүлийн өдрүүдэд худалдааны төвөөр иргэд олноороо бөөгнөрсөн байдал их ажиглагдаж байна. Энэ нь эргээд эдийн засаг болон эрүүл мэндэд хохиролтой. Хэрэв энэ байдал цаашид үргэлжилбэл, эдийн засагт маш хүнд дарамт ирнэ.
Халдвар хүн амын 1 болон 5 хувьд тархахад эдийн засагт учруулах дарамт болон нэг хүний эмчилгээний зардлыг тооцож судалгаа хийж байна. Хэрэв эрүүл мэндийн яамнаас өгч байгаа сэрэмжлүүлэг, анхааруулгыг ягштал мөрдөж чадвал эрүүл мэндээ хамгаалаад зогсохгүй эдийн засагтаа ч үр өгөөжтэй байх юм* гэлээ.
