Улсын драмын эрдмийн театрын 90 жилийн ойг угтан нийт уран бүтээлчдийн дунд Монгол Улсын хөдөлмөрийн баатар, Төрийн шагналт, ардын жүжигчин Г.Гомбосүрэнгийн нэрэмжит “Театр 90-Монолог 2021* уралдааныг зохион байгуулж байна. Тус уралдааныг өнгөрсөн оны 12 дугаар сарын 25-ны өдрөөс 2021 оны 2 дугаар сарын 01-ний өдрийг хүртэлх хугацаанд УДЭТ-ын нийт уран бүтээлчдийн дунд зарласан.
Тус уралдааны гол зорилго нь уран бүтээлчид бие дааж, ажиллах, мэргэжлийн ур чадварыг дээшлүүлэх, ганцаарчилсан болон хувийн номерийн үзүүлэлтийн баяжилттай болж, чанартай бүтээлийг цахим орчинд түгээж, үзэгчдийн хүртээл болгоход оршиж байгаа юм.
Энэ уралдаанд драмын театрын 25 уран бүтээлч оролцож, өөрсдийн ур чадвараа гайхууллаа. Ковид-19 вирусын халдвар Монгол Улсад бүртгэгдэж, дотоодын халдварын тоо нэмэгдэж байгаа энэ цагийн үеийн нөхцөл байдлаас болоод халдвар хамгааллын дэглэмийг сахин цахим хэлбэрээр анх удаа явуулж байгаа аж.
Уралдааны эцсийн шалгаруулалтыг тусгай комисс буюу УДЭТ-ын найруулагчдын зөвлөл шүүн дүгнэж шилдгүүдийг тодруулан энэ сарын 10-нд шагналыг гардуулна.
