Олон нийтийн дунд коронавирусийн шинж тэмдэггүй хүн явж байх эрсдэл маш өндөр байгааг ХӨСҮТ-ийн танадалт судалгааны албаны дарга А.Амбасэлмаа онцоллоо.
Өнгөрсөн 24 цагийн хугацаанд Дорноговь аймагт зам барилгын ажлаар очсон 12 хүний орох постон дээр зогсоож, шинжилгээ авахад 1 хүнээс халдвар илэрсэн. Энэ хүн аймагт орж хүнтэй уулзаагүй, постон дээр халдвар батлагдсан учраас Улаанбаатар руу зөөвөрлөжээ. Хамт явсан болон хавьтал болсон 20 гаруй хүнд шинжилгээ хийхэд халдвар илрээгүй байна.
Мөн өчигдөр Нийслэлийн “Өргөө” амаржих газарт жирэмсэн эмэгтэйгээс халдвар илэрсэн. Тухайн эмэгтэй урд өдөр нь шинжилгээ өгөөд хариу гарахаас өмнө өвдөж, “Өргөө” амаржих газарт амаржсан. Шинжилгээгээр онош батлагдаж, халдвар илэрсэн. Эх, нярайг төрөх эмнэлэгт тусгаарласан. Тэнд хавьтал болсон эмч, жирэмсэн эхийг тэнд нь тусгаарлажээ. Мөн гэр бүлийн 3 хавьтлыг тусгаарлах байранд тусгаарлажээ.
Хагалгаа хийсэн эмч нарын багийг ХӨСҮТ рүү шилжүүлэхээр бэлтгэж, тусгаарлах тасагт байлгаж байгаа талаар ХӨСҮТ мэдээллээ. Хагалгаанд орсон ээж болон, төрсөн хүүхдийн бие хэвийн байгаа аж.
Интермэд эмнэлгийн гаднах шинжилгээний цэгт шинжилгээ өгсөн иргэдээс халдвар илэрсэн байна. Харин тус эмнэлэгт халдвар бүртгэгдээгүй гэдгийг онцоллоо.
