Нэгдүгээр сарын 25-ны өдөр УИХ-ын гишүүн С.Ганбаатар МАН-ыг Рио Тинтогийн барьцаанаас чөлөөлж, алдагдсан Оюу толгойгоо буцаан авахын тулд өлсгөлөн зарлах болсоноо мэдэгдсэн. Харин 2021 оны 01 сарын 29-ны өдөр 00:38 цагт Төрийн ордонд талууд хэлэлцүүлэгт орон Рио Тинтогийн эсрэг сөрөг нэхэмжлэл гаргахаар төлөвлөж тохиролцсон.
Тэгвэл өнөөдөр Хууль зүй, дотоод хэргийн сайдын үүрэг гүйцэтгэгч Х.Нямбаатар Сүхбаатарын талбай дээр очиж уулзан өмнөх нэхэмжлэлийг сэргээх болсон гэдгийг дуулгаснаар УИХ-ын гишүүн С.Ганбаатар өлсгөлөнгөө зогсоолоо.
Энэ талаар С.Ганбаатар гишүүн өөрийн цахим хуудсаараа дамжуулан байр сууриа илэрхийллээ. Тэрбээр, “Бид Оюутолгойн гэрээг монголчууддаа ашигтай болгоход маш том алхмаар урагшиллаа. Монгол Улсын Ерөнхий сайдаас өгсөн чиглэлийн дагуу Хууль зүй, дотоод хэргийн сайдын бичгийг та бүхэнд танилцуулж байна.
Үүгээр өлсгөлөнгөө зогсоож, Оюутолгойн гэрээг монголдоо ашигтай болгохоор ажлын хэсэгт орж ажиллахаа мэдэгдэж байна. Та бүхэнд Оюутолгойтой холбоотой бүх асуудлаар мэдээ, мэдээллийг цаг тухайд нь мэдэгдэж байх болно” гэжээ.
