Улаанбаатар хотод коронавирусын халдварын батлагдсан тохиолдол 664 боллоо. Халдвар авсан хүмүүсийн дийлэнх нь 24-49 насныхан байна. Насны хувьд авч үзвэл 0-101 настай иргэн өвчлөөд байгаа юм. Тодруулбал, 0-4 насны 47 хүн, 5-9 насны 65 хүн, 10-14 насны 77 хүн, 20-24 насны 216 хүн, 25-29 насны 160 хүн, 30-34 насны 171 хүн, 35-39 насны 127 хүн, 40-44 насны 108 хүн, 45-49 насны 111 хүн, 50-54 насны 110 хүн, 55-59 насны 67 хүн, 60-64 насны 50 хүн, 65 дээш насны 73 хүн халдварт өртжээ.
Батлагдсан тохиолдлын зарим нь бие нь өвдөж, халдварын эмнэлзүйн шинж тэмдэг илэрсэн үедээ эрүүл мэндийн байгууллагуудад хандаж, эмнэлгийн туслалцаа авсан байна. Тухайлбал, Төрийн тусгайгийн нэгдсэн эмнэлэгт батлагдсан тохиолдол 2-3 удаа очиж үзүүлжээ. Иймээс тус эмнэлгийг хяналтад авч, 100 гаруй ажилчныг шинжилгээнд хамруулжээ. Одоогоор халдвар илрээгүй байна.
Мөн ХСҮТ-д нэг хавдартай өвчтөн очиж, тусламж авсан. Тус эмнэлгийн эмч, мэргэжилтнүүдээс шинжилгээ авч, хавьтал болсон 21 хүнийг тусгаарласан.
Түүнчлэн “Энэрэл* эмнэлэгт мөн батлагдсан тохиолдол очиж эмнэлгийн туслалцаа авчээ. Иймээс тус эмнэлгийн 90 гаруй хүнийг шинжилгээнд хамруулсан бөгөөд одоогоор халдвар илрээгүй байна.
Мөн батлагдсан тохиолдлын нэг нь Хан-Уул дүүргийн цагдаагийн газрын албан хаагч халдвар авсан нь батлагдсан тул Цагдаагийн газрынхныг шинжилгээнд хамруулж, 10 хүнийг тусгаарлажээ.
Баянзүрх дүүргийн 17-р хорооны 3000 гаруй хүнийг шинжилгээнд хамруулснаас 2000-аад хүний шинжилгээний хариу гарсан, коронавирус илрээгүй гэв.
