Газар хөдлөлтийн нөхцөл байдлаар мэргэжлийн байгууллагууд хамтран хэвлэлийн бага хурал хийж байна.
Одон орон геофизикийн хүрээлэнгийн захирал С.Дэмбэрэл: Хүчтэй газар хөдлөлтийг амжиж анхааруулах систем манай улсад бий. Улаанбаатарын эргэн тойронд 3 голомт бий. Дэрэнгийн газар хөдлөлтийн идэвхтэй бүс, Булган, Сэлэнгийн Бүтээлийн нурууны голомтууд тус тус бий. Эдгээрт томоохон хэмжээний газар хөдлөлт болбол дуут дохиоллын систем өөрөө ажилладаг. Бид энэ системийн горимыг МХЕГ-тай хамтран шалгахад хэвийн ажиллаж байсан. Харин өнөөдөр яагаад дуугараагүй вэ гэвэл улаан, ногоон, шар түвшинд буюу аюултай түвшинд хүрээгүй гэсэн үг юм.
Хүчтэй газар хөдлөлт болсны гол шалтгаан нь газрын хэвлийд их хэмжээний энерги хуримтлагдан, тэр энерги чөлөөлөгдөж, газрын хэвлийд тархах үзэгдэл юм.
МХЕГ-ын Дэд бүтцийн хяналтын хэлтсийн дарга Д.Жаргал: Улсын хэмжээнд 130 мянган барилга байдаг. Жилд 1000-1500 барилга шинээр ашиглалтад ордог.
Нийт барилгын 1970 оноос өмнө буюу газар хөдлөлтийн норм норматив гараагүй байхад баригдсан Улаанбаатар хотын барилга 8.7 хувь, орон нутгийн барилга 17.6 хувийг эзэлж байна. Харин орон нутгийн барилгын 16.6 хувь, Улаанбаатар хотын барилгын 2.1 хувь нь газар хөдлөлтийн тэсвэржилтийн шаардлага хангахгүй гэсэн судалгаа байна. Мэргэжлийн хяналтын байгууллага 2006-2020 оны хооронд 3820 барилгад газар хөдлөлтөд тэсвэргүй гэсэн дүгнэлт гаргасан.
Буулгах, бэхлэн хүчитгэх, дахин төлөвлөгөөнд оруулах шаардлагатай барилга нийслэлд нэлээд хэд бий. Энэ бүх мэдээллийг хотын удирдлагууд руу явуулсан.
Бид өнөө өглөөнөөс эхлэн Хөвсгөлд барилгын үзлэг шалгалт хийж байна. Ханх сумын сургууль, ЗДТГ-ын барилгын хана цуурсан, цонх хаалга хагарсан байна. Бусад аймагт ямар нэг гэмтэл үүсээгүй байна. Улаанбаатарт ажлыг хэсэг ажиллаж байна” гэсэн юм.
