Улаанбаатарт коронавируст халдварын бас нэг том голомт Ачтан эмнэлэг боллоо. Тиймээс Ачтан эмнэлгээр үйлчлүүлсэн иргэд халдварт өртсөн байх эрсдэл өндөр байна. 2020,12,15-наас хойш Ачтан эмнэлгээр үйлчлүүлсэн иргэд PCR шинжилгээнд хамрагдах хэрэгтэй байгаа талаар Эрүүл мэндийн яамнаас хэллээ.
Мөн тус эмнэлгээр үйлчлүүлсэн зарим иргэн хөдөө орон нутаг аймгуудыг зорьсон байна. Тиймээс мэргэжлийн байгууллагаас тухайн аймагтай нь холбогдож, Улаанбаатар хотоос очсон иргэдийг тусгаарлаж, шинжилгээ авч явуулахыг чиглэл болгожээ. Халдвар хөдөө, орон нутагт тархах эрсдэл маш өндөр байна. Тиймээс иргэдийг хөдөө, орон нутагт зорчихгүй байхыг анхаарууллаа.
Түүнчлэн Баянгол дүүргийн нэгдсэн эмнэлэг болон Гэмтэл согогийн үндэсний төвд Ачтан эмнэлгийн эмч нар очиж үзлэг хийсэн тул хавьтал гэж үзээд тусгаарлаж, ажилтан албан хаагчид болоод өвчтнүүдийг шинжилгээнд оруулжээ. Шинжилгээнд орсон хүмүүст коронавирус илрээгүй байна.
Цаашид шалтгаан тодорхойгүй, эх үүсвэр тодорхойгүй халдвар гарах эрсдэл өндөр байна. Хаана ч халдвар гарах нөхцөл өндөр байна. Тиймээс ард иргэд мэргэжлийн байгууллагаас өгч байгаа зөвлөгөө зөвлөмжийг тогтмол хэрэгжүүлэхийг уриалж байна.
