Засгийн газрын хуралдаанаас гаргасан шийдвэрийг Шадар сайд Я.Содбаатар танилцууллаа. Тэрбээр, Мэргэжлийн 11 байгууллагын гаргасан эрсдэлийн үнэлгээ, бусад төрийн байгууллагын саналд үндэслэн хатуу хөл хориог 1-р сарын 11-нийг хүртэл сунгах саналыг ЗГ-ын хуралдаанд оруулсан.
Засгийн газрын хуралдаанд асуудлыг олон талаас нь авч үзсэн. Нийслэл хотын хэмжээнд бүх нийтийн бэлэн байдлын зэргийг 2021.01.06-наа 4 хоног сунгахаар боллоо. Хатуу хөл хориог 2021 оны 1-р сарын 11-ний өдөр хүртэл сунгаж, худалдаа үйлдвэр, үйлчилгээний байгууллагын үйл ажиллагааг нээхээр шийдвэрлэлээ.
Хөл хориог цаашид үргэлжлүүлбэл эдийн засгийн хувьд хор хохирол ихтэй. Иймээс аль аль талыг бодож шийдвэр гаргасан.
Сүүлийн өдрүүдэд нийслэлийн хэмжээнд 3600 иргэнээс санал асуулга авсан. Үүний 70 хувь нь хөл хориог сулруулах нь зүйтэй гэсэн санал өгсөн. Харин 30 хувь нь хатуу хөл хорио тогтоож, үргэлжлүүлэх нь зүйтэй гэсэн санал ирүүлжээ. Нийтдээ бүх яам, голлох агентлагаас санал авахад 3-14 хоногоор хөл хориог сунгах нь зүйтэй гэжээ. Эдгээр саналыг олон талаас нь хэлэлцэн ирэх 7 хоногийн даваа гарагаас зэрэглэлийг буруулж, худалдаа, үйлдвэр үйлчилгээг эхлүүлэхээр шийдвэрлэж байна.
Азийн орнуудын сар шинийн баяртай холбогдуулан хатуу хөл хорио тогтоож байгаа. Засгийн газар аль болох уян хатан шийдвэр гаргахыг зорьж байна.
Хэрэв энэ долоо хоногт халдварын шинэ голомт дахин үүсч, дэлгэрвэл илүү хатуу арга хэмжээ авна. Хөл хориог сулруулсны дараа нөхцөл байдал хүндрэх, шинэ голомт үүсэх, эрүүл мэндийн салбарт хүндрэл үүсэхийг үгүйсгэх аргагүй. Энэ тохиолдолд хатуу хөл хорионы дэглэмд шилжиж орно.
Засгийн газраас хоёрдахь шийдвэр гарсан. Цагаагчин үхэр жилийн сар шинийн баярыг бүх нийтээр тэмдэглэхгүй байх шийдвэр гаргаж байна.
