Эрчим хүчний сайд Н.Тавинбэх болон УБЦТС-ээс цахилгааны төлбөр бичилттэй холбоотой мэдээлэл хийлээ. Төрөөс 2020 оны 12 дугаар сарын 01-нээс эхлэн айл өрх, ААН, албан байгууллагуудын суурь зардлууд болох цахилгаан, дулаан, хогны зардлыг хариуцаж байгаа. Мэдээллийн эхэнд 2020 оны 12 дугаар сарын төлбөрөө 2021 оны 01 дүгээр сард гарахад 11 дүгээр сарын төлбөр давхар багтсан байгааг хэллээ. Тухайлбал, 1-р сарын 1-5-нд гарах цахилгааны төлбөрүүдэд 2020 оны 11-р сарын төлбөр мөн багтсан гэв.
Эрчим хүчний сайд Н.Тавинбэх: Монгол Улсын Засгийн газрын шийдвэрээр цахилгаан, дулаан, дулааны уурын төлбөрийг 2020 оны 12 дугаар сарын 01-нээс эхлэн төр даахаар болсон. Долоон сарын хугацаанд бид тусгай журам гаргаж, олон нийтэд танилцуулсан. 12 дугаар сарын төлбөр гарсан байгаа. Дулааны эрчим хүчний хувьд ямар нэгэн маргаан гараагүй. Харин айл өрхийн цахилгаан эрчим хүчний төлбөртэй холбоотойгоор гомдол, маргаан гарсан.
Улаанбаатар хотын хэмжээнд 362500 хэрэглэгчид цахилгааны төлбөрийн бичилт хийснээс 137 мянга нь гэр хорооллын иргэд. Үүнээс 4914 гомдол Эрчим хүчний яаманд ирснээс 294 хэрэглэгчийн гомдлыг албан ёсны гомдол болгон хүлээн авч, гомдлыг арилгахаар ажиллаж байна. Төлбөр өндөр гарсан, 12 дугаар сарын 1-ээс төр хариуцаж байхад иргэн өөрөө төлөхөөр болж байгаа нь ямар учиртай вэ гэсэн гомдол их ирсэн.
Монгол Улсын хэмжээнд 690 мянган айл өрх байдаг. Цахилгааны заалтыг биеэр очиж авдаг, цаг хугацаа шаардсан ажил байдаг. Тиймээс тоолуурын заалт авахдаа 6 хэсэг болгож авдаг. Хэрэглэгч гэрээ байгуулан, сүлжээнд холбогдсон өдрөөс эхлэн 30 хоногийн хугацаагаар нь тасалбар болгодог.
Жишээлбэл, 11-р сарын тодорхой хоногууд 12-р сарын төлбөр дээр орж ирж буйг иргэд ойлгох хэрэгтэй. Өөрөөр хэлбэл, 11 сарын 10-30-ныг хүртэлх төлбөр дараагийн сарын төлбөрт багтаж байгаа юм. Засгийн газрын тогтоол гарснааас хойш цахилгааны хэрэглээ өссөн. Тухайлбал, 1100 мегаватт гардаг байсан бол 12-р сарын 31-нд 1300 гарсан. Улсын хэмжээнд цахилгааны хэрэглээ 20 орчим хувиар өссөн. Төрөөс төлбөрийг даахдаа өнгөрсөн оны мөн үеийн төлбөртэй харьцуулж төлөх учраас иргэд хэрэглээндээ хянамгай хандах хэрэгтэй.
Цар тахалтай холбоотойгоор төлбөрөө төлөөгүй ч цахилгаан, дулааныг хязгаарлахгүй байгаа. Гэхдээ энэ нь 12 сарын бүх төлбөрийг тэглэсэн гэсэн үг биш юм. Өмнөх сарын төлбөрийн мэдээлэл болон өмнөх жилийн мөн үеэс хэрэглээ тань давсан эсэхийг мөн шалгах хэрэгтэй. Түүнчлэн иргэдэд санал гомдол байгаа бол 7004-7004 дугаарт хандах боломжтой гэлээ. 294 хүний гомдлыг барагдуулахаар ажиллаж байна.
Засгийн газрын шийдвэрээр 12-р сарын нэгнээс хойш дундаж хэрэглээний төлбөрийг төрөөс даах болсон гэв.
–Засгийн газраас айл өрхүүдийн цахилгааны төлбөрийг тэглэхээр шийдвэрлэсэн ч агуулгаараа өөрчлөгдлөө. Цахилгааны төлбөрийг хөнгөлөх болон тэглэх хоёрын ялгааг тайлбарлахгүй юу?
-2020 оны 12 дугаар сарын 1-ээс 2021 оны 7 дугаар сар хүртэл цахилгаан, дулааны уур, хог, усны төлбөрийг төрөөс хариуцахаар болсон. Өөрөөр хэлбэл, хэрэглэгчийн хэрэглэсэн цахилгаан дулаан эрчим хүчний төлбөрийг долоон сарын хугацаанд төрөөс хэрэглэгчийн өмнөөс төлж байна. Иймд төр шийдвэрээсээ ухраагүй.
-Цахилгааны төлбөр нь сард 30 мянган төгрөг гардаг айлынх 90 мянган төгрөг болж өссөн гэх гомдол цөөнгүй байна?
-Арванхоёрдугаар сарын төлбөрийн тухайд буруу ойлгосон байна. Хэрэглэгчдийн хувьд хоёр сар дамжин төлбөр өгдөг. Арванхоёрдугаар сарын эрчим хүчний төлбөрт өмнөх сарын төлбөр болон арванхоёрдугаар сарын төлбөр тодорхой хэмжээгээр байгаа. Тухайн сард бичилтэд ороогүй төлбөр дараагийн сард орно. Хэрэглэгчдэд ногдох хэмжээ багассан. Өмнөх сарын төлбөрийн тооцоо арванхоёрдугаар сард нэмэгдсэн тул төлбөр өндөр гарсан мэтээр ойлгогдож байна.
