ЭМЯ-наас коронавируст халдварын нөхцөл байдлын талаар мэдээлэл хийлээ.
ХӨСҮТ-ийн Тандалт, судалгааны албаны дарга А.Амбасэлмаа: 2021.01.01-ний өдрийн байдлаар 11152 хүнд PCR шинжилгээ хийхэд 22 хүнд коронавирус илэрлээ. Үүний 15 нь Улаанбаатар хотод бүртгэгдсэн бол үлдсэн 7 нь зөөвөрлөгдөн ирсэн тохиолдол бүртгэгджээ.
Зөөвөрлөгдсөн 7 тохиолдол нь Франкфурт Улаанбаатар чиглэлийн тусгай үүргийн онгоцоор ирсэн бөгөөд тусгаарлагдсан байсан хүмүүс. Тус нислэгээр ирсэн хүмүүсийг ажиглан тусгаарлах байранд байршуулсан бөгөөд “Амар” зочид буудалд байсан тав, “Жаргалант”-ад байсан хоёр хүнээс халдвар илрээд байна.
Мөн тус буудалд үйлчилж байсан резидент эмчийн шинжилгээ мөн эерэг гарсан. Тийм учраас Амар зочид буудалд халдвар тархах эрсдэлээс сэргийлж 100 гаруй хүнийг нүүлгэн шилжүүлэлт хийж, үйлчилгээний ажилчдыг сольсон.
Дотоодод 15 тохиолдол нэмэгдсэний 4 нь “Мөнххада” ХХК-ийн голомтоос нэмэгдсэн /нийт 6/. Ойрын хавьтлын 35 хүнийг тусгаарлаж, 92 хүнийг гэрийн хяналтад байлгаж шинжилгээ хийсэн. Хоёр нь Төв шуудан компанийн гүнийн гаалийн хэсэгт ажилладаг ажилтнаас илэрсэн, нэг хүнийх нь гэр бүлийн хүн өвчилсөн байсан учраас халдвар авсан байна. Хавьтал болсон 70 гаруй хүнийг ажиглалтад авч ойрын хавьтлуудыг тусгаарласан байгаа.
Баянзүрх дүүргийн голомттой холбоотой 4 тохиолдол нэмэгдсэн. Мөн өргөн хүрээтэй шинжилгээ хийгдэж байгаа төвүүдийн нэг дээр гэр бүлийн 4 тохиолдол илэрсэн байна. ХӨСҮТ-д гэр бүлийн хавьтлаар нэг хүнд илэрсэн байна.
Дотоодын нийт тохиолдол 755 боллоо.
